كيف اعرف السبحة اللي تناسبني؟
السبحة مو بس خيط وخرز…
هي قطعة تعكس ذوقك، وشي يرافقك في يومك، وفي لحظات هدوءك و استغفارك.
ومع تنوع السبح، صار كل نوع له طابع مختلف. فيه السبح العملية اللي مناسبة للاستعمال اليومي إلى السبح الفاخرة اللي تبرز ذوقك، وأنواع ثانية تعطيك إحساس وتجربة مختلفة تمامًا.
لو بتدخل عالم السبح، غالبًا البداية تكون من البكلايت لأنه الأكثر انتشار، واللي يعتمد عليه أغلب الناس يوميًا.
البكلايت هو مادة تصنع من الراتنج يتم تسخينها وتشكيلها تحت ضغط عالي، بعدها تقص ويتم تلميعها لين توصل لشكل الخرز النهائي. وتمتاز سبح البكلايت بخفة وزنها، وقدرتها على تحمّل الاستخدام اليومي
.
وتختلف السبح حسب قصة الخرزة، لأن القصة هي اللي تعطي شمل السبحة. و من القصات المتعارف عليها:
- الدائرية: كلاسيكية، وتعتبر الأكثر انتشارًا.
- الزيتونية: تكون ممدودة شوي مثل حبة الزيتون.
- البرميلية: أعرض وأوضح في اليد، وتعطي السبحة حضور ملفت.
- بيض حمام: تكون ممدوة ونحيفة مثل بيض الحمام
- الذروي: دائرية وصغيرة كأنها ذرة وتعطي طابع فخم بالمسكة.
- العدسية: تكون مسطحة قليلًا، ومناسبة للي يحب ملمس مختلف.
- المضلعة: فيها زوايا ولمعة أوضح، وتعطي شكل ملفت.
و انواع كثير ولكن هذي الابرز.
وفي النهاية، شكل السبحة ما يكتمل إلا بالتمليكة، وهي الجزء الأخير منها وتعطي مظهر مهم في جمال السبح و تجي بأشكال مختلفة :
الكركوشة: نهاية خيطية كلاسيكية، تعطي السبحة طابع تراثي وبسيط.
الطربزونة: نهاية معدنية أنيقة، وتجي غالبًا ستيل أو فضة وتعطي شكل أفخم.
التمليكة : وتجي في اشكال مختلفه ولكن اللي متعارف عليها اللي تكون من نفس خرز السبحة.
السلسلة: نهاية معدنية بشكل عصري، مناسبة للي يحب التصميم المختلف.
مع الوقت كثير من الناس يبدأ يجرب أنواع مختلفة…
البعض يفضّل السبح ذات الروائح مثل تراب الكهرمان و المسكتة و الصندل والكوك الخ... لأنها تعطي تجربة هاديه وأقرب للاسترخاء.
وفيه اللي يختار الأحجار الطبيعية مثل التوباز والعقيق والفيروز لانها تحمل حجر طبيعي ومميز.
أما الفاتوران والكهرمان، فهي خيارات لعشاق السبح الفاخرة والقطع اللي لها حضور وقيمة أعلى.
الكوك
الكوك يتم صناعته من الخشب الطبيعي. ويمتاز بخفة وزنه وملمسه المريح، ويعطي إحساس بسيط وهادئ أثناء الاستخدام واللي يميز سبح الكوك انه يحفظ الرائحة بحيث اذا تم دهنه بدهن عود او تم تعطيرة يحفظ الكوك الرائحة ومع الوقت يعرق ويعطي شكل السبحة افخم.
الأحجار الطبيعية
الأحجار الطبيعية مثل التوباز و العقيق والفيروز تستخرج من الاحجار الطبيعة، ثم تُقص وتُصقل وتُلمّع حتى تأخذ شكل الخرز.
وتمتاز بشكلها الفريد، حيث تختلف كل حبة عن الثانية، وتعطي إحساس فخم ومميز.
الفاتوران
الفاتوران مادة صناعية قديمة تُصنّع من راتنجات خاصة، يتم تشكيلها ومعالجتها لتعطي ألوان غنية ولمعة مميزة.
ويمتاز بملمسها الناعم وحبتها الكبيرة اللافتة ، ويعتبر من السبح اللي لها قيمة عند المهتمين.
الكهرمان
الكهرمان مادة طبيعية متحجرة تكونت عبر الزمن من صمغ الأشجار، ويتم تشكيلها وصقلها لتصبح خرز للسبح.
ويمتاز بخفة وزنه وألوانه الدافئة ولمعته الجميلة، ويعطي إحساس فخم وراقي.
السبح المعطّرة
تُصنع من أخشاب طبيعية مثل خشب الصندل، يتم تقطيعها وتشكيلها ثم تلميعها مع الحفاظ على رائحتها الطبيعية.
وتمتاز برائحة عطرية هادية تعطي إحساس راحة وهدوء أثناء الاستخدام.
تراب الكهرمان
تراب الكهرمان مادة تُصنع من بقايا الكهرمان بعد معالجتها وضغطها وتشكيلها لتأخذ شكل الخرز، وتعطي مظهر قريب من الكهرمان الطبيعي.
ومع الاستخدام تطلع له ريحة خفيفة مميزة تعطي إحساس فخم أكثر، ويعتبر خيار ممتاز للي يبغى شكل فاخر بسعر مناسب.
الدومنة
لعبة الدومنة المعروفة أيام أول، حيث يتم قصّ القطع وتشكيلها وصقلها لتتحول إلى خرز للسبح.
وتمتاز بقوتها وتحملها العالي، وملمسها الناعم، وتعطي إحساس مختلف وفخم أثناء الاستخدام
مستكة مصري
تمتاز بخفتها وملمسها المريح، وتعطي إحساس بسيط ورايق أثناء الاستخدام، وغالبًا تجي برائحة خفيفة مميزة تضيف لها طابع خاص وتعتبر خيار مناسب للي يحب السبحة العملية بشكل أنيق وسعر مناسب.
النوادر
النوادر ما تكون مرتبطة بخامة وحدة، بل تكون سبحة مميزة بخامتها أو تصميمها أو ندرتها، وغالبًا تُصنع بكميات محدودة أو بتفاصيل خاصة.
وتمتاز بكونها فريدة وملفتة وتعكس ذوق مختلف.